Árangur okkar manna er búinn að vera hreint út sagt magnaður í vetur og ótrúlegt að fylgjast með bæjarfélaginu í úrslitakeppninni þar sem líf allra bæjarbúa hefur nær eingöngu snúist um körfubolta og meira að segja var maður að sjá fólk öskra sig hása uppí stúku sem manni hefði aldrei dottið í hug að myndu mæta á svona íþróttaviðburð. Samheldni bæjarbúa er búinn að vera ótrúleg síðustu vikur og er það virkilega frábært að sjá. Þetta er vonandi eitthvað sem er komið til að vera og verður gaman að sjá fólk fjölmenna svona á völlin á næsta/u tímabilum.

Annað sæti Íslandsmótsins er frábær árangur og hvað þá í ljósi þess að við erum nýliðar í úrvalsdeild og hefur liðið skrifað margar blaðsíður í sögubækurnar fyrir þær sakir. En svona árangur næst fyrst og fremst með frábærum þjálfara, öflugum leikmönnum sem eru tilbúnir að leggja allt í sölurnar, frábærri stjórn og sjötta manninum, stuðningsmönnunum, sem hafa verið magnaðir í vetur með Græna drekann fremstan í flokki.

Áfram Þór!

Græni drekinn hefur sett niður á blað söngvana sem þeir syngja á leikjum Þórs og núna getur þú sótt söngvana, með því að vista wordskjalið sem fylgir hér að neðan.

Núna getur öll stúkan sungið með í stúkunni á miðvikudaginn þegar Grindvíkingar mæta í Þorlákshöfn í leik fjögur.

Söngbók Græna Drekans

Staðan í einvíginu er 2-0 fyrir Grindavík og verða okkar menn að vinna í kvöld ef þeir ætla að koma í veg fyrir að Grindavík hampi íslandsmeistaratitlinum að leik loknum.

Nú þurfa Þorlákshafnarbúar að fjölmenna á pallana í Röstinni og hvetja strákana til sigurs!

Forsala á fyrsta leikinn verður í Íþróttamiðstöðinni í Þorlákshöfn á morgun (sunnudag) frá kl. 14 en leikurinn verður á mánudaginn í Grindavík kl. 19.15 og er því tilvalið tækifæri að notfæra sér nýja flotta suðurstrandarveginn og skella sér í Grindavík og hvetja áfram okkar menn.

Þeir sem ætla að skella sér á leikinn eru hvattir til þess að versla sér miða í forsölunni.

Þór og KR háðu fjórðu viðureign sína í gærkvöldi í 4.liða úrslitum Iceland Expressdeildarinnar. Leikurinn var í járnum strax frá fyrstu mínútu og ljóst að Íslandsmeistarar KR ætluðu ekki að gefa neitt. Þeir sóttu mun meira inn á stóru mennina en í leik 2 og 3 og voru Ferguson og Finnur að draga vagninn fyrir þá í fyrri hálfleik. Þórsarar voru einnig mjög einbeittir enda myndi sigur skila þeim í úrslit. Staðan eftir fyrsta leikhluta var 19-18.

Sama spennan hélt áfram leikmenn KR voru að hitta betur fyrir utan 3ja stiga línuna en Þórsarar gáfu ekkert eftir og leiddu í hálfleik 46-45.  Þórsarar fundu ekki sama varnartakt í fyrrihálfleik og þeir hafa sýnt í undanförnum leikjum.

3.leikhluti byrjaði vel fyrir heimamenn sem fengu gríðarlegan stuðning úr troðfullri stúkunni. Hrafn þjálfari tók leikhlé þegar að staðan var orðin 55-47, eftir það var allt í járnum og staðan fyrir lokaleikhlutann 69-66 fyrir Þór.

Í 4.leikhluta fóru Þórsarar að sýna sitt rétta andlit í vörninni og voru lokamínúturnar ekki fyrir viðkvæma, Josep Henley kom Þór yfir 82-80 eftir stoðsendingu frá Darrin Govens. Dæmd var sóknarvilla á Ferguson í næstu sókn KR sem að urðu því að brjóta á Þórsurum, Guðmundur Jónsson fór á vítalínuna og setti fyrra vítið niður en klikkaði á því seinna. KR fengu tvo sjénsa á 3ja stiga skotum í lokin en hittu ekki og Þórssigur staðreynd.

Hreint út sagt glæsilegur árangur hjá Benna og strákunum sem eiga þetta svo sannarlega skilið eftir að hafa lagt gríðarlega mikið á sig í vetur. Nú er bara að bíða og sjá hvort að við mætum Grindavík eða Stjörnunni og undirbúa sig undir það, því að strákarnir eru langt í frá saddir.

Stuðningur bæjarbúa í kvöld sem að fylltu Icelandic Glacial höllina var frábær og fleitti liðinu klárlega yfir erfiðustu hjallana í leiknum.

Darrin Govens: 22 stig/10 stoðs/ 8 frák/ 6 stolnir: Þessi drengur er hreint út sagt búinn að vera frábær í þessum leikjum gegn KR og leikurinn í gær var engin undantekning. Frábær sóknarlega og er farinn að finna leikmennina í kring um sig mun betur en áður.

Guðmundur Jónsson: 16 stig/ 3 frák: Gummi nýtti öll trikkin úr reynslubankanum í kvöld og skilaði frábærum leik og var virkilega góður í öllum leikjunum gegn KR.

Joseph Henley: 16 stig/ 11 frák: Besti leikur Joey hingað til, frákastaði vel og er að ruslast vel við körfuna, þekkir sín takmörk og er ekki að taka neitt frá liðinu.

Grétar Ingi Erlendsson: 12 stig/ 3 stolnir: Mjög flottur leikur hjá Grétari, var óheppinn með villur og hefði skorað mun meira ef ekki hefði komið til þess. Var kominn í mikinn ham sóknarlega þegar að hann villaði út. Flott sería að baki hjá honum gegn KR og er kominn með mikið sjálfstraust.

Blagoj Janev: 8 stig / 8 frák: Flottur leikur hjá Blagoj, hefur oft skorað meira en var gríðarlega sterkur í vörninni, hvort sem var á sinn mann eða í hjálparvörn. Var mjög góður í allri seríunni.

Darri Hilmarsson: 7 stig/ 3 stoðs:  Mjög góður í kvöld og er búinn að vera magnaður gegn sínum gömlu félögum úr KR.

Baldur”Fjall” Ragnarsson: Kom inn með mikla baráttu eins og alltaf og spilaði massavörn.

Frábær sería að baki gegn ríkjandi Íslandsmeisturum og bara taumlaust skemmtun framundan.

Dómarar leiksins voru þeir Kristinn Óskarsson og Björgvin Rúnarsson, mjög erfiður leikur að dæma fyrir þá og komust þeir vel frá því þó að ekki hafi allir skilið suma dómana, enda mikill hiti í leikmönnum, þjálfurum og stuðningsmönnum því að vissulega var mikið undir í þessum leik.

Þór í þúsund ár.

Mynd: Hjalti Vignis

Græni drekinn sem frumsýndur verður í kvöld.

Búast má við KR-ingunum band brjáluðum í kvöld eftir tapleikinn á fimmtudaginn í Þorlákshöfn og má reikna með miklum baráttu leik. Fyllum DHL höllina af Þorlákshafnarbúum og látum vel í okkur heyra með Græna drekanum, en til gamans má geta þess að Græni drekinn hefur eignast lukkudýr sem er að sjálfsögðu vígalegur dreki og verður hann frumsýndur á leiknum í kvöld.

Leikurinn fór rólega af stað liðin voru ekki að setja skotin sín, eflaust stress í báðum liðum, en þó átti Þór frumkvæðið og setti Blagoj
Janev niður sniðskot. Darrin Govens setti niður 3 þrista og Gummi einn,  Þórsarar virkuðu öruggir í  sínum aðgerðum og unnu fyrsta leikhluta 24:12

Ég leyfi mér að segja það að senuþjófurinn í öðrum leikhluta hafi verið nýji maðurinn Joseph Henley, eða Joey eins og hann er kallaður.  Hann reif niður fráköst og var grjótharður í teignum, þó hann hafi að vísu ekki sett öll sín skot, þá fóru öll vítin hans í
leiknum rétta leið.  Vörnin hjá Þórsurum var rosaleg og Kr átti engin svör, sem skilaði sér á töfluna og hálfleikstölur
voru 73:51!

Benedikt hefur eflaust lesið yfir sínum mönnum í hálfleik þrátt fyrir þægilega stöðu í leiknum, því þeir slökuðu ekki á, heldur bættu í. Góð vörn skilaði sér, menn duglegir í hjálpar vörninni og að stíga manninn sinn út, enda náðu Finnur og félagar nánast ekki frákasti af Grétari og Joey undir körfunni.

Þór náði mest 29 stiga forskoti sem verður að teljast frábær árangur gegn Íslandsmeisturnum!

Í byrjun fjórða leikhluta vissi maður nánast að sigur okkar manna væri í höfn, þrátt fyrir að auðvitað geti allt gerst í körfubolta.
Kringar virtust andlausir og langt frá því að nenna að leggja neitt á sig til að vinna þennan leik. Meðan að okkar menn mættu einbeittir og samstilltir, og með dyggum stuðningi úr stúkunni, sem var troðfull tókst þeim að vinna stór sigur á Kr 94-76.

Darrin Govens setti 30 stig, gaf  5 stoðsendingar og reif 5 fráköst og var algjörlega frábær í þessum leik, þó að frábær sé eflaust ekki nógu sterkt lýsingar orð, sóknarlega var hann óstöðvandi, hann hefur sýnt það í vetur að ef hann keyrir að körfunni er hann banvænn, og öll vitum við að hann er frábær skytta en sum skotin sem hann setti í leiknum voru ekki af þessum heimi.

Gummi Jóns setti 17 stig ásamt því að spila sína grjóthörðuvörn, ekki myndi ég vilja mæta þessum manni í körfubolta, maðurinn virðist bara ekki eiga slæman leik.

Blagoj Janev setti 14 stig og tók 7 fráköst og skilaði sínu mjög vel í leiknum, gaman að sjá hvað hann hefur eflst inni í teig, orðinn alveg grjótharður, og frábær skytta sem klikkar varla úr skoti

Baldur Þór átti góðan leik setti 2 stig og gaf 7 stoðsendingar, gaman var að fylgjast með Baldri og Darrin í leiknum, þegar að Kr spilaði pressuvörn, áttu Kringar ekki séns í þá, enda báðir gífurlega hraðir og öruggir með boltann.

Darri Hilmarsson setti 14 og gaf 4 stoðsendingar, Darri er grjótharður leikmaður sem sýndi fyrrum liðsfélögum sínum enga miskunn, Darri er gríðarlega dýrmætur leikmaður, hann er vinnuhestur sem skilar alltaf sínu.

Grétar Ingi setti 4 stig og tók 9 fráköst, skilaði sínu mjög vel og virkilega gott að hann hafi náð sér af meiðslunum fyrir úrslitakeppnina, enda feikiöflugur leikmaður.

Joseph Henley lenti klukkan 17 á leikdag, og Junior kenndi honum kerfin á leiðinni heim. Því myndi ég segja að 13 stig og 6 fráköst væru mjög góður árangur í leiknum. Hann þekkti eiginlega liðsfélaga sinna lítið, en skilaði sínu vel, mér virðist við fyrstu sýn sem hann sé klár leikmaður sem geri ekki mikið af mistökum. Vinnuhestur sem hægt er að stóla á, hann kemur til með að fylla skarð Junior, en það verða þó að teljast vonbrigði vetrarins að geta ekki notað Junior meira í vetur vegna meiðsla.

Þór í þúsund ár

Rúnar Gunnarsson